Ж.Қурбонов, Самарқанд шаҳри
Жавоб:
Перинатал ўлим ҳақидаги тиббий гувоҳномаларни бериш тартиби Ўзбекистон Республикаси Вазирлар Махкамасининг 1999 йил 12 апрелдаги қарори билан тасдиқланган Ўзбекистон Республикаси Фуқаролик ҳолати далолатномаларини қайд этиш қоидалари тўғрисидаги Низом асосида амалга оширилади. Яъни, ўлик туғилган боланинг туғилганлиги, шунингдек ҳаётининг биринчи ҳафтасида ўлган (перинатал ўлим) болаларнинг туғилганлиги ва ўлимини қайд этиш тиббий муассаса аризасига биноан шу худуддаги ФҲДЁ органи томонидан 24 соат ичида амалга оширилади. Агар бола туғилгандан кейин вафот этса, ҳатто у бир неча дақиқа яшаса ҳам, туғилиши ҳамда ўлими ҳақидаги иккита ёзувдан иборат далолатномалар тузилади. Бундай ҳолларда туғилиш ҳақидаги далолатнома ёзуви туғилганлик ҳақидаги тиббий маълумотнома асосида, ўлганлиги ҳақидаги далолатнома ёзуви эса перинатал ўлим ҳақидаги тиббий гувоҳнома асосида амалга оширилади. Бунда туғилганлик ҳақидаги далолатнома ёзувида онаси туғрисидаги маълумотлар тўлиқ келтирилади, “Белгилар учун” устунида эса боланинг ўлганлиги қайд этилганлиги ҳақидаги далолатнома ёзувининг тартиб рақами ва санаси кўрсатилади. Бундай ҳолларда боланинг туғилганлиги ҳақида (ўлик туғилганда ҳам) суғурта кассасига ва қабристон учун маълумотнома берилади. Зарур ҳолларда ота-онасининг илтимосига кўра (тирик туғилиб, сўнг вафот этган бола учун) ўлими ҳақида гувоҳнома берилиши мумкин.
Саволга Самарқанд шаҳар 4-сон ФҲДЁ бўлими мудираси В.Ганиева жавоб берди.