Улуғ байрам шукуҳи

Самарқанд вилоят адлия бошқармасида Ўзбекистон Республикаси давлат мустақиллигининг йигирма икки йиллик байрамига бағишланган йиғилиш бўлиб ўтди.

Йиғилишда адлия бошқармаси ва муассасалари ходимлари иштирок этдилар.

Ўзбекистон заминига киндик қони тўкилган ҳар бир киши шу азиз ва муқаддас юртнинг фарзандлари. Ўз юртида ўзи хоҳлагандек озод ва обод ватан бунёд этиш, унда эмин-эркин яшаш, ўз тараққиёт йўлини эркин белгилаш, меҳнатининг самарасини, роҳатини кўриш, иқтидор ва имконияти, кучу-қудратини дунёга намоён этиш каби ҳуқуққа эга. Айнан Мустақиллик шарофати билан Ўзбекистон фуқаролари ана шундай Олий ҳуқуқни қўлга киритди.

Шунинг учун ҳам бугун Ватанимиз Мустақиллигининг 22 йилида ҳар биримиз босиб ўтган мураккаб, айни дамда шарафли йўлимизга назар ташлар эканмиз, авваламбор бу улуғ неъматнинг халқимиз, юртимиз ҳаётида қандай буюк аҳамият касб этганини ўйлашимиз табиий, албатта.

Мазкур тадбирда сўзга чиққанлар бундан 22 йил муқаддам Ўзбекистон Республикаси Президенти Ислом Каримовнинг маънавий жасорати туфайли қўлга киритилган Мустақиллик, том маънода халқимизнинг асрий орзулари ушалганлигини англатишига, бу муқаддас кун – 1 сентябрь, мамлакатимизда “Энг улуғ, энг азиз байрам” сифатида нишонланиб келганини алоҳида таъкидлаб ўтдилар.

Шунингдек, тадбирда таъкидланганидек, истиқлол шарофати билан Ўзбекистон аввало ўзининг мустақил давлат сифатидаги барча ҳуқуқларини қайта тиклади, ўз моддий ва маънавий бойликларининг, ўз манфаатларининг ҳақиқий эгаси, қудратли ҳимоячисига айланди. Ушбу ҳуқуқ ўзлигимизни англаш, саховатли заминимиз бойликларини, халқимизнинг улкан яратувчанлик ва интеллектуал салоҳиятини Ватанимиз равнақи, ҳеч кимдан кам бўлмай яшашимиз, буюк орзуларимиз рўёби йўлида сафарбар этиш имконини берди.

Дарҳақиқат, мамлакатимизда, шу азиз юрт фуқаролари сифатида ҳар биримизнинг шахсий ҳаётимизда, оиламизда, маҳалламизда, меҳнат жамоамизда ёки илмий-ижодий фаолиятимизда юз берган ўзгаришлардан қувонмаслик, ғурурланмасликнинг иложи йўқ. Истиқлол шароитида кечаётган умримизнинг ҳар йили ўтган асрнинг тўқсонинчи йиллари бошида Ўзбекистон танлаган миллий тараққиёт йўлининг нақадар тўғри ва халқчил эканини исботлаш билан бирга, мамлакатимиз, халқимиз бу йўлдан асло оғишмай, Президентимиз раҳбарлигида ўзининг буюк келажаги сари дадил қадам ташлаётганини яққол кўрсатиб турибди.

Тадбир якунида вилоят адлия бошқармаси ва муассасалари ходимларидан бир гуруҳига самарали фаолияти учун фахрий ёрлиқлар ва байрам совғалари топширилди.

Самарқанд вилоят адлия бошқармаси Тарғибот ва ҳуқуқий маърифат бўлими