Ёш оила марказлари

Мустақил ватанимиз келажаги ўсиб келаётган фарзандларимизга боғлиқдир. Фарзанд келажаги эса соғлом оиладагина камолга етади.

Саломатлик инсоннинг жисмоний, руҳий ва унинг узоқ умр кўриши, болаларнинг туғилиши ва тарбияланишида зарурий шарт-шароитлар асосини ташкил этади.

Юртбошимизнинг Ўзбекистон Республикаси Конституциясининг 22 йиллигини муносиб кутиб олиш ҳақидаги маърузаларида кўрсатиб ўтилганидек, соғлом болани тарбиялашнинг асосий омилларидан бири спортдир. Шу ўринда алоҳида таъкидлаб ўтиш жоизки, Самарқанд вилояти Пастдарғом туманида фаолият кўрсатаётган ўрта-махсус касб-ҳунар таълим муассасаларида ёшларнинг спорт билан шуғулланишлари учун барча шарт-шароитлар мавжуд бўлиб, айниқса қизлар орасида спортнинг каратэ тури билан шуғулланиш кенг йўлга қўйилган.

Жумладан, Самарқанд вилояти Пастдарғом туман Политехника касб-ҳунар коллежида қизлар орасида спортнинг каратэ тури бўйича 1 та жаҳон чемпиони, 2 та Ўрта Осиё чемпиони, 4 та Ўзбекистон Республикаси чемпиони етишиб чиққан.

Ҳалқимиз азал-азалдан оилани муқаддас деб билган, оилалар мустаҳкам бўлишида мунис аёлларимизнинг ўрни жуда катта. Агар оиламиз тинч бўлса, ишларимиз юришиб, ўзимизни дунёда энг бахтли инсон деб, ҳис этамиз. Фақат оилагина инсонни бахтли қила олади. Оила хонадондаги эр-хотин, болалар, бобо ва бувилар бирга яшайдиган қўрғон ҳисобланади. Ушбу қўрғон мустаҳкам экан, юртимиз тинчлиги, ҳалқимиз фаровонлиги ошади.

Шундай экан, ёшларнинг ҳуқуқ ва манфаатларини ҳимоя қилиш ҳамда, уларнинг маънавий ва жисмоний камол топишида туман хотин-қизлар қўмитаси, туман ФҲДЁ бўлими, туман ИИБ бўлими, вилоят ўрта-махсус касб-ҳунар таълими бошқармаси, “Камолот ёшлар ижтимоий ҳаракати” бўлими, туман тиббиёт бирлашмаси, “Оила илмий амалий маркази” бўлими, туман бош имом хатиблари билан ҳамкорликдаги Ўзбекистон Республикаси Президентининг 2009 йил 1 июлдаги “Аҳолининг репродуктив саломатлигини мустаҳкамлаш, соғлом бола туғилиши, жисмоний ва маънавий баркамол авлодни вояга етказиш борасидаги ишларни янада кучайтириш ва самарадоролигини ошириш чора-тадбирлари дастури тўғрисида”ги қарорида белгиланган вазифаларни амалга ошириш мақсадида ўқув йиллари давомида ўрта–махсус касб-ҳунар таълими муассасаларининг 3-босқич талабаларига “Ёш оила қурувчилар мактаби” машғулоти юзасидан тузилган ҳамкорлик режасига асосан машғулотлар ўтказилмоқда.

Ёш оила қурувчилар мактаби машғулотларида ёш оила қурувчиларга кундалик иш фаолиятидан, кундалик турмуш тарзидан келиб чиққан ҳолда, уларга муомала маданиятига, атроф муҳитга бўлган муносабат туғрисида, қолаверса, кийиниш маданиятига, миллий урф одатларимиз қадриятларимизга амал қилган ҳолда, яшаш тарзини шакллантириш мақсадга мувофиқ бўлиши ҳақида алоҳида уқтириб ўтилмоқда.

Олиб борилаётган ёш оила қурувчилар мактаби машғулотлари хотин-қизларни ижтимоий-ҳуқуқий жиҳатдан қўллаб-қувватлаш, оналик ва болаликни муҳофаза қилиш, ёшларни касбий, жисмоний, маънавий ва интеллектуал жиҳатдан ўстириш, уларнинг ижтимоий фаоллигини ошириш, соғлом турмуш тарзини тарғиб қилиш, айниқса, қишлоқ жойлардаги ёшларни ҳуқуқ ва манфаатларини ҳимоя қилиш ҳамда уларнинг маънавий жисмоний камол топишига қаратилган.

М.Маллаева, Пастдарғом туман 1-сон ФҲДЁ бўлими мудираси