Янгиликлар
13
2024 ЙИЛДА ҚАРИЙБ 1000 ТА ҲУҚУҚИЙ МУАММО КЎРИБ ЧИҚИЛДИ
2024 ЙИЛДА ҚАРИЙБ 1000 ТА ҲУҚУҚИЙ МУАММО КЎРИБ ЧИҚИЛДИ
Бу ҳақида Пайариқ туман адлия бўлими бошлиғи Ориф Ҳолбоев иштирокидаги матбуот анжуманида маълум қилинди.
Таъкидланишича, 2024 йилда бўлимга 854 та мурожаат келиб тушган бўлиб, уларнинг 543 таси қаноатлантирилган, 177 таси юзасидан ҳуқуқий тушунтириш берилган ва 112 та мурожаат тааллуқлилиги бўйича бошқа ташкилотларга юборилган ҳамда 4 та мурожаат мурожаат муаллифларининг илтимосномасига мувофиқ кўрмасдан қолдирилган.
Бундан ташқари, адлия бўлими томонидан олиб борилган 27 та ўрганиш ва 38 та мониторингларда 2 370 га яқин қонун бузилиш ҳолатлари аниқланган. Мазкур қонун бузилишлари ва уларнинг сабаблари, шунингдек бунга олиб келувчи шарт-шароитларни бартараф этиш тўғрисида 78 та тақдимнома ҳамда 37 та огоҳнома туманнинг турли идораларига киритилган. Ушбу идораларнинг 10 нафар ходимлари интизомий, 46 нафар шахс маъмурий жавобгарликка тортилган. Хусусан, амалдаги норматив-ҳуқуқий ҳужжатларга зид равишда қабул қилинган 138 та ҳужжат бекор қилинган. Киритилган тақдимномалар бўйича 2 310 000 000 сўмлик маблағлар фуқароларга тўланиши таъминланган.
— Шунингдек, адлия бўлими томонидан 46 та даъво аризалар иқтисодий ишлар бўйича Пайариқ туманлараро судига киритилиб, тадбиркорга тўланилиши лозим бўлган 1 023 000 000 сўмлик маблағлар суд ҳал қилув қарори билан ундирилган, — дейди Ориф Ҳолбоев ўз сўзида давом этар экан. — Халқ депутатлари туман Кенгаши ва туман ҳокимлиги томонидан қабул қилинган 10 та норматив-ҳуқуқий ҳужжатлар лойиҳалари ҳам ҳуқуқий экспертизадан ўтказилиб, уларга тегишли тартибда экспертиза хулосалар берилиши таъминланган.
“Муҳаммаджон Порлоқ қурилиш” МЧЖ раҳбари қарийб 400 миллион сўмлик бажарган ишлари учун иш ҳақини ололмай сарсон бўлган. Пайариқ туман адлия бўлими аралашуви билан тўловлар тадбиркорга тўланиши таъминланди.
Фуқаролар билан мулоқотларда ўртага ташланаётган масалалардан келиб чиқиб, амалдаги қонунчиликни янада такомиллаштиришга қаратилган 10 дан ортиқ таклифлар бўлим томонидан адлия вазирлигига тақдим этилди.
Ўзбекистон Республикаси Қонунлари, Президент Фармон, Қарорлари, Вазирлар Маҳкамасининг Қарорлари, бошқа норматив-ҳуқуқий ҳужжатлар ҳамда Давлат дастурларнинг аҳамиятини, мақсадини ва моҳиятини етказиш, тушунтириш, бепул ҳуқуқий маслаҳатлар бериш, аҳолини ҳуқуқий маданиятини ошириш мақсадида туман адлия бўлими ходимлари мутасадди идоралар билан ҳамкорликда ҳамда оммавий ахборот воситалари орқали 101 маротаба ҳуқуқий тарғибот тадбирлари ўтказилди.