Янгиликлар
Adliya nazorati: 270 nafar mas’ul intizomiy, 1635 nafari ma’muriy javobgarlikka tortildi
Viloyat Matbuot uyida viloyat adliya boshqarmasi va hududiy adliya bo‘limlari tomonidan 2024 yilda amalga oshirilgan ishlar sarhisobi hamda kelgusi rejalarga bag‘ishlangan matbuot anjumani bo‘lib o‘tdi.
Unda mavzu yuzasidan boshqarma boshlig‘i Salohiddin Sattorov ma’lumot berdi. Ta’kidlanganidek, hisobot davrida tizim tashkilotlariga mahalliy davlat hokimiyati organlaridan kelib tushgan 194 ta normativ-huquqiy tusdagi qarorlardan 163 tasi huquqiy ekspertizadan o‘tkazilgan. 31 holatda qaror loyihasi belgilangan talablarga rioya qilinmay taqdim qilinganligi sababli qaytarilgan.
Shuningdek, mahalliy hokimliklar tomonidan “E-qaror” elektron tizimi orqali qarorlar qabul qilishda 169 ta qonunbuzilishiga yo‘l qo‘yilganligi aniqlangan. Bu 2023 yilning mos davridagi ko‘rsatkichga (726 ta) nisbatan qariyb 4 baravar kam degani.
Hisobot davrida boshqarma tomonidan davlat idorasi va tashkilotida o‘tkazilgan nazorat tadbirlarida 136 mingdan ortiq huquqni qo‘llash bilan bog‘liq qonunbuzilish holatlari aniqlangan. Ularni bartaraf qilish yuzasidan 1465 ta taqdimnoma, 108 ta ogohnoma, 1635 ta mas’ullarni ma’muriy javobgarlikka tortish yuzasidan, 9 ta jinoiy javobgarlikka tortish yuzasidan takliflar va sudlarga 933 ta ariza kiritilgan. Natijada 270 nafar mas’ul intizomiy, 1635 nafari ma’muriy javobgarlikka tortilgan. Qo‘llanilgan huquqiy ta’sir choralari natijasida 115 milliard 738 million so‘m miqdoridagi pul mablag‘i qonuniy egalariga qaytarilgan.
- Huquqiy targ‘ibot faoliyatimizning asosiy yo‘nalishlaridan biri hisoblanadi, - deydi Salohiddin Sattorov. – Xususan, adliya mutaxassislari joylarga chiqqan holda “Huquqiy mahalla”, “Huquqiy xizmatlar kuni” singari qator loyihalarni amalga oshirib, aholiga amaliy va nazariy ko‘mak berib kelmoqda. Bundan tashqari, Yuridik xizmat ko‘rsatish markazlari tomonidan o‘tgan yili 2 mingdan ortiq tashkilot va muassasalarga yuridik xizmat ko‘rsatildi. Bu davrda ularda 637 ming 838 ta hujjat loyihalari huquqiy ekspertiza qilinib, 40 ming 64 tasi qonunchilikka zid bo‘lganligi sababli qaytarildi.
2025 yilda viloyatdagi yana 192 ta mahallani “Huquqiy mahalla”ga aylantirish yuzasidan tegishli chora-tadbirlar belgilab olinganligi ma’lum qilindi.