Yangiliklar
Payariq tuman adliya bo‘limi Davlat xizmatlari markazida tashkil etilgan “Huquqiy maslahat burchagi” fuqarolarning kundalik hayotida uchrayotgan huquqiy muammolarni hal etishda muhim platformaga aylanmoqda.Tadbir davomida Payariq tuman DXM direktori M. Fayzullayev hamda 1-son FHDY bo‘limi mas’ul xodimi Z. Abdurahmanova tomonidan fuqarolarga ularni qiynab kelayotgan masalalar yuzasidan birlamchi yuridik maslahatlar berildi.
Shuningdek, O‘zbekiston Respublikasi Prezidentining PQ-1-sonli qarori ijrosini ta’minlash doirasida onlayn firibgarlik va kiberjinoyatlarning oldini olishga hamda hududlarda yashirin iqtisodiy faoliyat bilan bog‘liq holatlar yuzasidan aniqlangan faktlarni huquqni muhofaza qiluvchi organlarga yetkazish tartibi bo‘yicha tushuntirishga qaratilgan buklet va infografik materiallar tarqatilmoqda.
Mazkur tashabbus fuqarolarning huquqiy savodxonligini oshirish, raqamli xavfsizlik bo‘yicha xabardorligini kuchaytirish hamda huquqiy madaniyatni yuksaltirishga xizmat qilmoqda.
Qonunchilikka ko‘ra, arxiv xizmatlarini ko‘rsatishda quyidagi hujjatlarni talab qilish bekor qilinadi:
talabgorlarni arxiv hujjatlarini tartibga keltirishga kompetentligi yuzasidan attestatsiyadan o‘tkazishda tegishli arxiv muassasasi yoki tashkilot rahbarining tavsiya xati;
mavzuli so‘rovlar to‘g‘risida ma’lumotnoma berishda so‘ralayotgan hujjatning nusxasi.
davlat mulki bo‘lgan arxiv hujjatlari yoki ularning ko‘chirma nusxalari, shuningdek, Milliy arxiv fondining nodavlat qismiga kiritilgan arxiv hujjatlari yoki ularning ko‘chirma nusxalarini O‘zbekistondan tashqariga vaqtincha olib chiqish uchun ruxsatnoma berishda arxiv hujjatlarini tasarrufdan chiqarish yoki bir shaxsdan ikkinchi shaxsga o‘tkazish shaklini tasdiqlovchi hujjatlar;
tijorat tashkiloti hujjatlarining belgilangan tartibda davlat arxiviga topshirilganligini tasdiqlovchi ma’lumotnoma.
Samarqand shahridagi 45-maktabda “Eng yaxshi huquq o'qituvchisi" respublika ko'rik-tanlovining Samarqand viloyat bosqichi bo'lib o'tmoqda.
Tanlovda 48 nafar huquq fani o'qituvchilari ishtirok etishmoqda.
Mazkur saralash jarayonidan muvaffaqiyatli o'tganlar keyingi bosqichda o'zaro kuch sinashadi.
Viloyat adliya boshqarmasi boshlig‘i S. Sattarovning “Inson va qonun” gazetasida mazkur nomdagi maqolasi chop etildi.
Maqolada Prezidentning PQ-1-son qarori ijrosi doirasida mahallalarda xavfsiz muhit yaratish, huquqbuzarliklarning xususan, oilaviy nizolarning oldini olish hamda aholining huquqiy madaniyatini yuksaltirish borasida amalga oshirilayotgan ishlar yoritilgan.
Samarqand viloyat adliya boshqarmasi boshlig‘i o'rinbosari Sh.Abduxalimov rahbarligida Samarqand shahar “Shukrona” MFYda sayyor qabul tashkil etildi.
Ushbu qabul davomida fuqarolar bilan ochiq muloqot o‘tkazilib, ularni qiynab kelayotgan masalalar bevosita joyida tinglandi. Har bir murojaat ortida inson taqdiri turgani inobatga olinib, muammolarga alohida e’tibor qaratildi.
Sayyor qabul jarayonida 10 dan ortiq murojaat qabul qilinib, ularning ayrimlari joyida hal etildi, qolganlari yuzasidan esa tegishli mutasaddilarga aniq vazifalar yuklatildi.
Fuqarolarga o‘z huquqlari, murojaat qilish tartiblari hamda mavjud imkoniyatlar yuzasidan batafsil tushuntirishlar berildi.
Xalq deputatlari Samarqand viloyati Kengashining tegishli qarori bilan yana 1501 nafar fuqaroning yakka tartibdagi uy-joylari hamda ular joylashgan yer uchastkalariga nisbatan egalik huquqi rasman e’tirof etildi.
Ma’lumot uchun, “O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi qonun ijrosi doirasida shu kunga qadar viloyat bo‘yicha jami 9 910 nafar fuqaroning yer va mulkka bo‘lgan huquqlari qonuniy asosda tan olingan.
Avval xabar berganimizdek, Samarqand viloyatida oilaviy nizolarni kamaytirish, aliment masalalarini tizimli hal etish hamda fuqarolar murojaatlarini kompleks o‘rganishga qaratilgan “Jamoatchilik ovozi” guruhi o‘z faoliyatini boshladi.Bugungi kunda mazkur tizim doirasida ishlar jadal sur’atlarda olib borilmoqda.
Ushbu tashabbus doirasida:
“Nuroniy” jamg‘armasi viloyat bo‘limi
Oila va xotin-qizlar boshqarmasi
Mahallalar uyushmasi
Adliya boshqarmasi
Ichki ishlar boshqarmasi
Majburiy ijro byurosi (hududiy boshqarmasi)
Ma’naviyat va ma’rifat markazi
Bandlik va kambag‘allikni qisqartirish bosh boshqarmasi
Ijtimoiy himoya agentligi (hududiy boshqarmasi)
Yoshlar ishlari agentligi (hududiy boshqarmasi)
Mусулмонлар идораси (hududiy boshqarmasi)
va boshqa mas’ul idoralar hamkorlikda faoliyat yuritadi.
Asosiy vazifalari:
oilaviy nizolarning oldini olish
aliment masalalarini tizimli hal etish
ajrimlarning oldini olish va oilalarni yarashtirish
ijtimoiy muammolarni kompleks o‘rganish va bartaraf etish
mahalla darajasida barqaror ijtimoiy muhit yaratish.
“Jamoatchilik ovozi” maqsadi— muammoni yuzaki hal qilish emas, balki uning ildiz sabablarini bartaraf etish hamda oilalarni saqlab qolishdir.
O‘zbekiston Respublikasi Prezidentining 2026-yil 3-martdagi PF-33-son Farmoni ijrosi doirasida Qo‘shrabot tumanida keng qamrovli targ‘ibot tadbiri o‘tkazildi
Mazkur farmon ijrosini ta’minlash, uning mazmun-mohiyatini keng jamoatchilikka yetkazish hamda aholi o‘rtasida huquqiy ong va madaniyatni yuksaltirish maqsadida Qo‘shrabot tumanidagi Zarkent mahallasida targ‘ibot tadbiri tashkil etildi.
Unda tuman hokimining o‘rinbosari S.Maxmudova, tuman FHDYO bo‘limi rahbari G.Yarqulova, IIB mas’ullari, tegishli tashkilot va muassasalar vakillari, soha mutaxassislari hamda keng jamoatchilik vakillari faol ishtirok etdi.
Tadbir davomida ishtirokchilarga Prezident farmonining asosiy yo‘nalishlari, unda belgilangan vazifalar hamda amalga oshirilayotgan islohotlarning mazmun-mohiyati batafsil tushuntirildi
Samarqand shahridagi 4-FHDY bo‘limi tashabbusi bilan oila institutini mustahkamlash, oilaviy ajrimlarning oldini olish, xotin-qizlar bandligini ta’minlash va salomatligini mustahkamlash, shuningdek, xotin-qizlar o‘rtasida jinoyatchilik, tazyiq va zo‘ravonlikka qarshi kurashish borasida amalga oshirilayotgan ishlar keng muhokama qilindi.
Yig‘ilishda huquqni muhofaza qiluvchi organlar rahbarlari va ularning o‘rinbosarlari, mas’ul tashkilotlar hamda ommaviy axborot vositalari vakillari ishtirok etdi.
Muhokamalar davomida erta nikohlarning oldini olish, nikohni qonuniy rasmiylashtirmasdan turmush qurish holatlariga barham berish, ajrim yoqasidagi oilalarni qo‘llab-quvvatlash va yarashtirish, shuningdek, to‘y va boshqa oilaviy marosimlarni kamxarj va ixcham tarzda o‘tkazish masalalariga alohida e’tibor qaratildi.
Shuningdek, O‘zbekiston Respublikasi Prezidentining 2026-yil 3-martdagi PF-33-son Farmoni mazmun-mohiyatini keng targ‘ib qilish, unda belgilangan ustuvor vazifalarni joylarda tizimli amalga oshirish, xotin-qizlarni qo‘llab-quvvatlash, ularning huquq va manfaatlarini himoya qilish hamda oilalarni mustahkamlash borasidagi ishlarni yanada kuchaytirish zarurligi ta’kidlandi.
Qabul qilingan qarorlarga muvofiq, haftaning ma’lum kuni “Oila kuni” etib belgilandi. Mazkur kunda mutasaddilar hududlardagi FHDYO bo‘limlarida aholi bilan uchrashib, ularning murojaatlarini joyida ko‘rib chiqish va muammolariga amaliy yechim topish choralarini ko‘radi.
Yig‘ilish yakunida barcha mutasaddilarga belgilangan vazifalar ijrosini ta’minlash yuzasidan aniq topshiriqlar berildi.
Aziza KABILDJANOVA,
Samarqand shahridagi 4-FHDY bo‘limi
Bugungi kunda mamlakatimizda iqtisodiy barqarorlikni ta’minlash, moliyaviy shaffoflikni oshirish hamda yashirin iqtisodiyot ulushini qisqartirish borasida keng ko‘lamli islohotlar amalga oshirilmoqda. Bu borada naqdsiz hisob-kitoblarni keng joriy etish muhim ahamiyat kasb etadi.
Xususan, O‘zbekiston Respublikasi Prezidentining “Naqdsiz hisob-kitoblarni ommalashtirish va yashirin iqtisodiyot ulushini qisqartirishga qaratilgan qo‘shimcha chora-tadbirlar to‘g‘risida”gi PF–246-son Farmoniga muvofiq, joriy yilning 1-aprelidan boshlab ko‘chmas mulk hamda transport vositalarini oldi-sotdi qilishda hisob-kitoblar faqat naqdsiz shaklda amalga oshirilishi belgilandi.
Mazkur tartibga ko‘ra, endilikda bitimlar notarius va banklar o‘rtasidagi elektron ma’lumotlar almashinuvi orqali rasmiylashtiriladi. Bu esa, o‘z navbatida, mablag‘larning qonuniy aylanishini ta’minlash, korrupsion holatlarning oldini olish hamda fuqarolar uchun qulay va xavfsiz tizim yaratishga xizmat qiladi.
Shu munosabat bilan Toyloq tumani adliya bo’limi tomonidan hududlarda ushbu tizimning amaliy ijrosi o‘rganilmoqda. Xususan, tumanda faoliyat yuritayotgan xususiy amaliyot bilan shug‘ullanuvchi notariuslar hamda bank filiali xodimlarining faoliyati bilan yaqindan tanishildi.
O‘rganishlar davomida avtomobil oldi-sotdi jarayonlari amalga oshirilayotgan MChJ hududida yaratilgan shart-sharoitlar, elektron tizimlarning ishlashi hamda fuqarolarga ko‘rsatilayotgan xizmatlar sifati ko‘zdan kechirildi.
Mutasaddilar tomonidan mazkur yo‘nalishda amalga oshirilayotgan ishlarni yanada takomillashtirish, xizmat ko‘rsatish jarayonlarini soddalashtirish va aholiga qulaylik yaratish yuzasidan tegishli tavsiyalar berildi.
Odiljon YOQUBOV,
Toyloq tumani adliya bo’limi bosh mutaxassisi