Yangiliklar
Kattaqo‘rg‘on tumani FHDY bo‘limi tomonidan tuman hokimligi Xotin-qizlar bo‘limi, tuman IIB hamda boshqa hamkor tashkilotlar bilan birgalikda Kattaqoʻrgʻon tuman 2-son texnikumida davra suhbati tashkil etildi.
Tadbir davomida yoshlar o‘rtasida erta nikoh va erta tug‘ruqning oldini olish, oilaviy hayotga tayyorgarlik, nikohning huquqiy asoslari hamda oila mustahkamligini ta’minlash masalalari muhokama qilindi.
Shuningdek, yoshlarga erta nikohning salbiy oqibatlari, uning ta’lim olish, salomatlik va kelajak hayotiga ta’siri haqida tushunchalar berildi.
Davra suhbatidan ko‘zlangan asosiy maqsad — yoshlarning huquqiy savodxonligini oshirish, ularning kelajakka mas’uliyat bilan yondashishiga ko‘maklashish hamda sog‘lom va mustahkam oilalarni shakllantirishdan iborat.
Davlat xizmatlari tizimining samaradorligi, avvalo, fuqarolarning kundalik hayotida sezilishi kerak. Xizmatlardan foydalanishda ortiqcha ovoragarchiliklarning kamayishi, murojaatlarning tezkor hal etilishi va aholining vaqti tejalishi bu boradagi ishlarning muhim natijasidir.
Adliya vaziri Akbar Tashkulov Samarqand viloyatida davlat xizmatlari markazlari faoliyati bilan tanishishni davom ettirmoqda.
Ishtixon tumanidan so‘ng vazir Samarqand tumani adliya bo‘limi Davlat xizmatlari markazida bo‘lib, fuqarolarga xizmat ko‘rsatish jarayonlari, mavjud sharoitlar hamda ish faoliyatining tashkil etilishini ko‘zdan kechirdi.
Asosiy e’tibor xizmatlar sifatini oshirish, fuqarolarning murojaatlarini tezkor ko‘rib chiqish, elektron xizmatlardan foydalanishni kengaytirish va aholiga yanada qulay sharoitlar yaratish masalalariga qaratildi.
Zero, davlat xizmatlari tizimida amalga oshirilayotgan har bir o‘zgarish, eng avvalo, inson manfaatlariga xizmat qilishi, fuqarolarning vaqti va mablag‘ini tejashda o‘z ifodasini topishi lozim.
“Mualliflik huquqini himoya qilish oyligi” doirasida Samarqand viloyat axborot-kutubxona markazida respublika bo‘ylab kutubxona xodimlari ishtirokida “Kutubxona va mualliflik huquqi: kutubxonachi nimalarni bilishi kerak?” mavzusida o‘quv mashg‘ulotlari o‘tkazildi.
Mashg‘ulotlar davomida mualliflik huquqiga rioya qilish, intellektual mulkni himoya qilish, adabiy va ilmiy asarlardan qonuniy foydalanish hamda kutubxona xodimlarining huquqiy savodxonligini oshirish masalalariga e’tibor qaratildi.
Mazkur tadbir kutubxona xodimlarining kasbiy bilimlarini mustahkamlash, mualliflik huquqiga hurmatni keng targ‘ib etish va axborot-kutubxona xizmatlari sifatini oshirishga xizmat qiladi.
Mualliflik huquqiga hurmat — ijodga hurmat!
Samarqand shahar davlat xizmatlari markazida haydovchilik guvohnomasi vaqtincha berilmaydi.
Viloyat adliya boshqarmasi shuni ma'lum qiladiki, aniqlangan texnik nosozliklar sababli, Samarqand shahar davlat xizmatlari markazida ushbu xizmat vaqtincha ko‘rsatilmaydi.
Mazkur xizmatdan foydalanish istagida bo‘lgan fuqarolar o‘zlariga qulay bo‘lgan boshqa tumanlardagi Davlat xizmatlari markazlariga murojaat etishlari mumkin.
Texnik muammo bartaraf etilgach, qo‘shimcha axborot beriladi.
O‘zbekiston Respublikasi Fuqarolik kodeksining 134-moddasiga ko‘ra, ishonchnoma — bir shaxsning boshqa shaxsga uchinchi shaxslar oldida vakillik qilish uchun bergan yozma vakolatidir.
Ishonchnoma orqali vakil boshqa shaxs nomidan muayyan harakatlarni amalga oshirishi mumkin. Bunda uning vakolatlari ishonchnomada belgilangan doira bilan cheklanadi.
Unutmang: ishonchnoma bu shunchaki hujjat emas, balki qonuniy vakillik vakolatini tasdiqlovchi hujjatdir.
Adliya vazirligi jamoasi barcha yurtdoshlarimizni O‘zbek tili bayrami bilan samimiy tabriklaydi!
1989-yil 21-oktabrda o‘zbek tiliga davlat tili maqomining berilishi xalqimizning milliy o‘zligini anglash va mustaqillik sari intilishida tarixiy voqea bo‘ldi. Bugun esa davlat tilining nufuzini yuksaltirish Yangi O‘zbekistonda amalga oshirilayotgan islohotlarning muhim ma’naviy va siyosiy yo‘nalishlaridan biriga aylangan.
Davlat tili davlat va jamiyat o‘rtasidagi ishonch, milliy birlik va fuqarolik daxldorligining muhim asosidir.
Ona tilimizning qadri yuksak, davlatimizning nufuzi baland, xalqimizning birligi mustahkam bo‘lsin!
Giyohvandlik vositalarini har qanday usulda tarqatish qonun oldida javobgarlikka sabab bo‘ladi. Giyohvandlikka qarshi birgalikda kurashaylik.
2026-yil 15-oktabrdagi Xalq deputatlari Samarqand viloyati Kengashining navbatdagi o'ttiz sakkizinchi sessiyasida yana 4 615 nafar fuqaroning yakka tartibdagi uy-joylari hamda ular joylashgan yer uchastkalariga nisbatan egalik huquqi rasman e’tirof etish masalasi maqullandi.
Ma’lumot uchun, “O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi qonun ijrosi doirasida shu kunga qadar viloyat bo‘yicha jami 24 450 nafar fuqaroning yer va mulkka bo‘lgan huquqlari qonuniy asosda tan olingan.
Adliya vaziri A. Tashkulovning Samarqand viloyati Qo‘shrabot tumanidagi “Shovona” mahalla fuqarolar yig‘inida navbatdagi sayyor qabuli tashkil etildi. Tadbir davomida fuqarolar bilan ochiq muloqot qilinib, ularni qiynayotgan masalalar yuzasidan murojaatlar tinglandi.
Qabul davomida jami 40 nafar fuqaroning uy-joy, yer va kadastr, meros munosabatlari, shuningdek, infratuzilmani yaxshilash hamda sog‘liqni tiklash bilan bog‘liq murojaatlari ko‘rib chiqildi.
Murojaatlarning 5 tasi joyida hal etilib, 2 tasi yuzasidan fuqarolarga huquqiy tushuntirish va tegishli tavsiyalar berildi. Qolgan 33 ta murojaat belgilangan tartibda ro‘yxatga olinib, mas’ullarga ijro uchun yo‘naltirildi.
Bundan tashqari, 5 nafar fuqaroga sayyor tartibda notarial harakatlar amalga oshildi, 3 nafar fuqaroga esa sayyor davlat xizmatlari ko‘rsatildi.
Har bir murojaatning qonuniy va adolatli hal etilishini ta’minlash maqsadida ular ijrosi alohida nazoratga olindi.
2026-yil 19-oktyabr kuni sayyor qabullar reja-grafigiga asosan Toyloq tuman adliya bo‘limi tomonidan tumandagi Davlatobod mahalla fuqarolar yig‘inida sayyor qabul o‘tkazildi.
Sayyor qabul davomida fuqarolarning huquqiy muammolari, murojaatlari hamda ularni qiynab kelayotgan masalalar tinglandi.
Fuqarolarga murojaatlar yuzasidan amaldagi qonunchilik normalari asosida huquqiy tushuntirishlar berilib, ko‘tarilgan masalalarni qonuniy hal etish bo‘yicha tegishli tavsiyalar berildi.
Sayyor qaballarning asosiy maqsadi — fuqarolarning huquq va qonuniy manfaatlarini himoya qilish, ularning huquqiy muammolarini joyida o‘rganish hamda aholiga sifatli huquqiy yordam ko‘rsatishdan iborat.
Toyloq tuman adliya bo‘limi tomonidan aholi bilan ochiq muloqot qilish, fuqarolarning murojaatlarini o‘z vaqtida o‘rganish va huquqiy ko‘mak ko‘rsatish ishlari davom ettiriladi.